Pošalji nam vijest
U subotu u Konpolju zbor - letnja Stipanja je
U subotu u Konpolju zbor - letnja Stipanja je
Objavljeno: 18-08-2017

KONPOLJE – Ma ki to more jutra propušćat, ma niki! Red je doć na zbor, na letnju Stipanju. Je da je suboton, al Bože moj, samo dan ranije nego ča se slavila negdanja Stipanja, vajk je bila na 20. kolovoza. Unda je popi u kalendaru premakli man iza Velike Gospe i verni narod se zbenal. Man je to don Angjelo razumil i lipo poturkal Stipanju od srede na subotu. Dela njemu frštunt, dela, tako će imat više naroda, doćedu dva biškupa, cela vrpa popov, i eto ti zbora kaj nigda.

Tako će lipo jutra biškup u miru Mile Bogović, i drugi biškup u miru Ivan Milovan, reć u 11 uri mašu. Biškupa Zdenka ne će bit, un vajk nekudaj po svitu šanžira, vajk je na nekvomu maršu. Al Konpoljčanima dobri i stari biškupi, provereno je provereno, ča je sigurno sigurno je. A na maši će pivat konpoljski zbor, pred njin će prston mavat Josa Šimatović, domaće dite od popa, e. Ima da sve grmi od pisme, u slavu Božju, eli. A kako i ne će kad ima muški ki u zboru bučedu li bučedu, nu.  

Na maši će biškupi blagoslovit i samu crikvu. Pa zač sadaj? Ta blagoslovljena je kad je izgrajena. Ne škodi, iznutra je lipo obeljena, kaj kocka cukra je, ča bi rekla teta Nane, pa red je, i neka je.

A unda, kad maša smiri, unda je pučko veselje oko crikve. Biće ića, biće pića, ča za novce, ča badave. A i živa kapela će svirit. E kad je tako, pa ki ne bi došal?

M. Krančević

Podijeli novost na društvenim mrežama!
Mjesto za Vaš oglas!
Novalja.coom

Pratite nas na:
Naši partneri:
Linkovi:
Ustanova za razvoj Senja
TZ Senj » NP sjeverni velebit
NEDA Senj
www.lastminute-hr.com